Mori gjykim maksimal pasi vrau vajzën dhe dhëndrin e tij, shqiptari nga Australia kërkon ulje të dënimit

Shqiptari nga Kosova Osman Shaptafaj i cili vrau vajzën e tij dhe burrin e saj në Australi në vitin 2019, ka kërkuar ulje të dënimit.

I shpallur fajtor për vrasjen e dyfishtë, ai u dënua me dy burgime të përjetshme për vrasjen e vajzës së tij, Lindita Musai, 25 vjeç dhe bashkëshortit të saj, Veton Musai, 29 vjeç.

Mirëpo ai ka kërkuar së fundmi ulje të dënimit, ku  argumentoi se kishte marrë dënimin maksimal pavarësisht se kishte të drejtën e një zbritjeje për shkak të deklarimit të tij si fajtor.  Edhe pse argumentoi mbi rrethanat lehtësuese, kërkesa e tij për një dënim më të lehtë, nuk u pranua nga Gjykata e Apelit.

Shaptafaj i kreu vrasjet pasi mësoi për martesën e vajzës së tij të larguar nga shtëpia dhe qëndroi duke i zënë pritë çiftit në shtëpinë e tyre në Yarraville pikërisht në natën e Vitit të Ri 2020. Vajza e tij Lindita, 25 vjeç vdiq në vend, ndërsa Vetoni, 29 vjeç, vdiq të nesërmen në spital. Çifti sapo ishte kthyer nga një udhëtim i shkurtër duke festuar përvjetorin e tyre të parë të martesës, ku pas një sherri mes tyre ai i ka qëlluar të dy e më pas edhe veten, ku mbeti i plagosur.

Sipas mediave australiane, bazuar te dëshmitë e të afërmeve të familjes, Lindita Musai pas martesës ishte përpjekur të fillonte një jetë të re larg babait të saj, por ai nuk e pranonte një fakt të tillë dhe ishte kundër largimit të saj nga shtëpia, për pasojë mori vendimin për t’i ekzekutuar. Një anëtar i familjes, i cili dëshironte të mbetej anonim, tha që vajza kishte kaluar një periudhë të vështirë për faj të të atit.

 

 

 

M.T/Shqiptarja.com

TAG:
• Osman Shaptafaj
• Australi
• Lindita Musai
• vrasje